Pages Menu
TwitterRssFacebook
Categories Menu

Posted by on May 2, 2012 in De taal | 0 comments

Min nzemmar ad negg s umawař n ufus? Yura t : Mohamed Essanoussi

 

Amawař n ufus war ijji amcan, netta aqa t di marra iřsawen n Tmaziɣt. Atarras ɣares afus (fus n waryaz), ařeyzim (agelzim) ɣares afus (fus n uřeyzim), taqmijjat ɣares afus (fus n teqmijjat), Tawwart ɣares afus (fus n tewwart), amjar ɣares afus (fus n wemjar), uřa d Arebbi ɣares afus; qqaren as waɛraben afus n Arebbi aqa t sennej i ifassen nsen!

Amawař n ufus imsebḍa ijj x wenneɣni, din bu tfust din bu wfus. Din ɛawed bu ifassen, amecnaw mammec din bu ifaxxen. Mařa min xef nessawař (ifassen) icna, neqqar as tifassin, niɣ ɣares tifassin areqqent! Iwdan n zic tuɣa temsawaḍen s usiǧef (gebaren, gestures) n ifassen. Iwdan xeddmen zzaysen, ssawařen zzaysen, tmenɣan zzaysen, temcubbucen zzaysen, sscanen zzaysen, wezznen zzaysen, ḥessben zzaysen, tettaren zzaysen, ssaggʷajen zzaysen tiṭṭawin n yewdan (lxamsa!), min texsed daysen. Řḥajjet mařa war ɣares afus, ɣares aɣiř/iɣiř, mařa war ɣares aɣiř ɣares aɣraw; mařa war ɣares afus ɣares tfust, mařa war ɣares aɣiř ɣares tiɣiřt, mařa war ɣares aɣraw ɣares taɣrawt. amecnaw aɣraw n weqbuc, aɣiř n usengar (het middengedeelte van een boom of plant). Am ufus am uɣiř am weɣraw marra ddaren di Tmaziɣin n zicenna.

Min nzemmar ad negg s ufus? Wanita d ijj n useqsi imɣar, yiriw, yuǧeɣ, maca ad nessemẓi aseqsi ya ḥuma ad naweḍ ɣar ijj n wufuɣ d anegray (conclusive). Tiɣuri n uyenkud (synchronic) n “Afus” di trifect d tcawect idweř qqaren as: fus, waxxa tiɣri nnes: afus, amecnaw ḍar (aḍar), fud (afud), aɣiř (ɣiř), řum (ařum). maca waxxa tiɣri (řḥarf) amezwaru iwḍa, itɣima issegdeř xmi (a)-fus iddakkwař d ‘i-fassen.’ A= ijj, {i….n} = aṭṭas, amencnaw a-drar=i-durar, a-ryaz = i-ryaz-n.

Aẓwar n ufus d ufud carcen niɣ qnen ɣar {F}. Xseɣ ad iniɣ aqa aẓwar n ufus {FS} d wenni n ufud {FD} daysen {F} icarc; imesři (ṣṣuṭ) nsen imsebḍa ijj x wenneɣni, imesři itegg ufus war iǧi amecnaw imesři itegg ufud: ifassen-ifadden. Taddiwin nsen war ǧi mquddan, s ijj n wawař nneɣni, ifassen uɛřan x ifadden d iḍaren. Aṭṭas n wawařen n Tmaziɣt i di iǧa weẓwar n {F} ɣares lmeɛna n nnejj amecnaw: Afar n wartu, afriwen n wejḍiḍ, afunas, asifef, asif, ixef n wedrar, x afes, taffa, tafat (tafukt).  Afalku (hawk).

Aẓwar n {F} icarc uřa aked iřsawen n midden amecnaw: float, flag, fly, vliegen. Deg weɣzdis nneɣni, ntaff aẓwar n {D} iqqen, waxxa war iǧi ca řebda, ɣar umawař n wadday amecnaw: deř, aḍiř, dřes, adan, iḍen-iḍennaḍ, adɣaɣ,  aḍar, adar (udareɣ ad esweɣ..), sḍar, sdeř,  aḍrig (dhairhee), taḍerṣa (tisi n řḥid).

Aṭtas n (imawařen n) ifassen d iḍaren weddaren, dewřen ɣar deffar. Di Tmaziɣt n zicenna (= in the past), iɣersiwen (animals) tuɣa ɣarsen imawařen nsen, manaya tuɣa iqqen ɣar yisem n iḍaren; arbiɛ tuɣa ɣares amawař iqqen ɣar iḍaren. Mařa nedweř ɣar tfednin, ntaff tafdent/tifednin itiři ɣar iřsanen (= iwdan), tifenzit/tifenza itiři ɣar ibersiwen niɣ iɣersiwen (animals) amecnaw afenzu n ufunas, tafenzut n ucarri.

Uřa d adrar di Tmaziɣt ɣares aɣiř d ufud amecnaw: aɣiř n umedɣ, adrar n ufud (the bush). Afus ɣares aṭṭas n wadmawen, amecnaw mammec ɣares aṭṭas n tzemmar n umsawaḍ. Afus dayes iḍewḍan (aḍaḍ ameqqran, aḍaḍ ammas (ameřwaṣu), aḍaḍ n ccahed, aḍaḍ ameẓyan (tḍat). Aḍar dayes tifednin.

Afus ɣares taqqa, qqaren as: taqqa (n) wfus, ɣares iḍewḍan, neqqar as idewan (n) wfus, dayes ɛawed accaren, accarren (n) wfus. Am inzan (proverbs), nzemmar ad ten negg s ufus d uḍar. Ntaff inzan amecnaw: “afus war tzemmared ad t tɣeẓẓe, suden it”; nzemmar ɛawed ad zzaysen nukkar niɣ ad zzaysen nhudd amecnaw: igga as (a)a, yisi ɣares (a)fus. Ḥuma ad nessemɣar amawař n ufus, ad nurzu imucan mani nzemmar ad t negg. Amec nniɣ sennej, iwdan n zic tuɣa temsawaḍen s usiǧef (gestures) n ifassen, tungit n wawařen tuɣa teqqen ɣar warecti n ufus; amecnaw ekk x ufusi, d afusi; niɣ zeg fus ɣar ufus.

Řextu, ad neqqim aked imedyaten i issawařen x ufus d ifassen. Afus nzemmar ad zzayes naǧ (help), amecnaw: iwca as (a)fusggin (a)fus deg (u)fus. Xmi ca n yijj innum itacar neqqar as aqa ɣares ifassen d iziraren. Xmi ca n ict tugi ad tegg afus nnes aked tinneɛni neqqar as aqa: ma teggid řenni i ifassen, niɣ? Neqqar as ɛawed aqa igg it s ifassen nnes. Mařa ca n yijj war ineffeɛ neqqar as: sired zzayes ifassen.

X uɣezdis nneɣni, afus tzemmared ad t twezned, neqqar s Tmaziɣty aqa ɣares afus ifsus, ɣares afus idqeř. Tzemmared ɛawed zeg umawař n ufus ad zzayes tegged amyag (verb) amecnaw: fsuseɣ, ifsus, fsusen, niɣ s-fsus (alleviate), s-efsi (deflate) u ruḥ xas am nni…..Tzemmared sennej i manaya ad tɣared (a)fus, neqqar as aqa: iruḥ ɣar tmegzut niɣ ɣar tgezzant ad as tɣar (a)fus. Nzemmar ɛawed ad naff amawař n ufus itwaserbez aked wawařen nneɣni amecnaw: aɣiř-ufus (forearm, avant-bras), din wi iqqaren i wenni  war ɣar ǧin ifassen: bifassen, niɣ mařa ɣares ijj n ufus d ameqqran ijj d ameẓyan, neqqar as  bu-tfust.

Ad nesquḍeḍ awař, addadet itɣima i wmeɣri minzi awařen i da uriɣ sennej twaggen s řefsaset minzi řexxu yiweḍ d wakud ad raḥeɣ ad ggeɣ ict n tfust n yiḍeṣ.

Facebook

Twitter